Posted on أترك تعليق

اردوينو!… لا سوري… اصلي لا مهندس و لا حتى ليا في الكهربا!!!!!

جمله بنسمعها كتير اول ما نجيب سيرة الآردوينو و ده لأن الناس فاهمه إن الأردوينو ده مدام بيشغل روبوتات و بيتوصل بأسلاك يبقي علي طول بتاع المهندسين و العالم دي. لكن الكلام ده غلط ، الاردوينو بالذات لما إتعمل كان الهدف منه إنه يكون أداه لكل اللي عنده فكره نفسه يعملها في مجال الإلكترونيات بس مش مهندس و لا ليه في الكهربا!

طبعاً زمان حضرتَك أو حضرتِك دلوقتي بتبص للكلام ده و مش فاهم إزاي يعني إن شاء الله؟؟

بص يا سيدي أو يا ستي… قبل ما نكمل إزاي الكلام ده… تعالوا نشوف الأردوينو ده ممكن يتعمل بيه إيه في المجالات المختلفة:

الزراعة مثلا؟ طيب شو ف دي و إزاي ممكن الاردوينو يستخدم لقياس نسبة الرطوبة في التربة و يروي الأرض بكمية المايه المناسبه لنوع النبات… على فكرة… دي دراسة كلية زراعة مش هندسه.

حضرتَك أو حضرتِك بتوع أعمال فنيه و إبداعيه؟ طيب شوفوا دي و ازاي تقدر تخلي المزيكا تغير شكل الانوار.

حتى في الطبيخ يا ساده… الأردوينو مش عاتق… شوفوا دي.

و فيه غير المثال ألف في مجالات كتيره جدا… طيب عظيم.. بس أصل أنا الإنجليزي عندي بعافية شوية و الأردوينو ده بيقولوا عاوز إنجليزي… برضوا كلام مش سليم… هو لما حضرتك بتشوف الأرقام مكتوبة بالإنجليزي (1..2..3…) بتعرف تقراها و لا لأ؟ بصراحة لو الإجابة لأ… يبقى تقدر تقفل الصفحة دي و تنسى الموضوع ده خالص و حقك علينا. بس لو قادر تقراء الأرقام الإنجليزية.. ممكن تقولي إزاي؟ أنا هاوفر عليك و أقولك.. لإنها مطبوعة في مخك و مش كتيره… و كذلك برضوا اللغة اللي بتستخدم لبرمجة الاردوينو… كلمات معينه و مش كتيرة في الأول هاتضطر كل شوية تبص بتتكتب إزاي.. بس بعد شوية و مع الوقت هاتحفظها و هاتعرف تخرج الأفكار اللي جوه دماغك بيها.

بس شغل الأردوينو ده محتاج أدوات و كده بقى؟.. لا مش شرط.. لو عندك كمبيوتر أو لابتوب مادام فيه مخرج يو إس بي… يبقى أنت جاهز.. ده غير إنك ممكن تجرب نفسك قبل حتى ما تشتري عن طريق برامج و صفحات بتعمل محاكاه للأردوينو فا ممكن تجرب نفسك و تشوف الموضوع هايمشي معاك و لا لأ.

طيب لو عاوز أعرف أكتر عن الموضوع… مبدئياً  تروح اللينك دي و تضيفها لقائمة المواقع المفضلة أو المرجعية (Bookmarks).. هاتلاقي على صفحتنا دي كتاب مجاني إعمله دونلود و هايفيدك كتير جدا… و عموماً لو فيه حاجه عطلان فيها أو عاوز تستفسر أكتر تقدر تدخل على صفحتنا دي و إبعت لنا و إحنا هانرد عليك و نساعدك بس إبداء إنت بس و بلاش كسل.. و بالتوفيق إن شاء الله.

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *